پنجاب ایجوکیشن فاؤنڈیشن اور بنک آف پنجاب کے درمیان پارٹنر سکولوں کو سولر پینلز کی فراہمی کا معاہدہ طے پا گیاہے۔ اس معاہدے کے تحت 7ہزار سے زائد پیف پارٹنرز کو سولر سسٹم کی خریداری کے لیے آسان اقساط پر قرضے دیے جائیں گے۔
اس حوالے سے آج یہاں بنک آف پنجاب کے دفتر میں ایک تقریب کا انعقاد ہوا۔ جس میں پنجاب ایجوکیشن فاؤنڈیشن سے منیجنگ ڈائریکٹر شاہد فرید، ڈپٹی منیجنگ ڈائریکٹر (آپریشن) ثمینہ نواز، ڈپٹی منیجنگ ڈائریکٹر (سپورٹس سروسز) راجہ محمد اشرف، ڈپٹی منیجنگ ڈائریکٹر (ایف سی آر ایم) محمد فاروق، ڈائریکٹر (فنانس) قاسم منیر اور ایڈیشنل ڈائریکٹر (ایف اے ایس) ایاز محمد عرفی نے شرکت کی۔ بنک آف پنجاب سے ہیڈ ریٹیل فنانس ڈویژن سلمان شاہ، ہیڈ گورنمنٹ سیکٹر ڈویژن غلام علی، ہیڈ پبلک سیکٹر ڈپوزٹ ڈویژن ندیم غلام بٹ اور دیگر افسران تقریب میں شریک ہوئے۔
تقریب کے دوران مفاہمت کی یادداشت پر ایم ڈی پیف شاہد فرید اور ہیڈ ریٹیل فنانس ڈویژن سلمان شاہ نے دستخط کیے۔اس موقع پر گفتگو کرتے ہوئے ایم ڈی پیف نے معاہدے کو خوش آئند قرار دیا اور کہا کہ شمسی توانائی کی سہولت سے 7ہزار سے زائد پیف پارٹنر ز کے بجلی کے بلوں میں کمی آئے گی اور 27لاکھ سے زائد طلبا و طالبات کو ماحول دوست بجلی فراہم کی جائے گی۔ انہوں نے مزید کہا کہ پیف پارٹنر ز کے لیے اس طرح کے مزید بہترین اقدامات اٹھائے جائیں گے۔
٭٭٭٭٭٭